【聲明】港生活網站並無進行電話推廣活動

陳淑蘭
陳淑蘭

到Tokyo Hands的戰利品

發佈時間: 2019/10/31

為咗保護樂天能量,不被香港的紛擾蠶蝕,我繼續每個禮拜尾都出短trip「抗暴避世」。上星期去台灣市場買乾貨,今期目的地則是大阪,目標是搜羅奇特的日常用品、藥品和嘗試做人手小顏瘦面療程,還有吃我至愛的河豚白子。就咁聽落,呢個trip確實真的出師有名。

無論去日本甚麼地方,Tokyo Hands都必定是我的朝聖地,因為每次去都有收穫,所以一定要慢慢睇,不能走漏眼走寶。

首先,我買咗好似卡片咁薄嘅放大鏡。佢可能未必啱你用,但絕對好啱我用。我已經有老花,但又唔想喺餐廳內攞副老花鏡出嚟睇餐牌,被朋友笑我成個婆仔咁,有咗呢個卡片放大鏡,就可以鬼鬼祟祟咁拎出嚟,唔使戴老花鏡先睇到餐牌了!

每次去Tokyo Hands都必定買半打GUM有尖膠釘嘅牙刷。呢款牙刷好耐之前香港都有賣,但而家已絕迹,在日本見到,如獲至寶。牙毛可以刷牙,但未必刷得到牙齒間的牙垢,用尖膠釘喺刷牙時順便撩出來,一枝刷兩個功效,我好滿意。今次我發現咗曉轉彎牙籤,佢用特別橡膠物料造,所以就算去到最入面位置嘅牙縫都撩到「戰利品」,yea!

今次買得我最開心就係呢隻Amane天音花灑頭。其實之前好多次嚟日本已經見佢出咗,但我就無特別為意,於是錯過咗幾年美妙淋浴時光。我屋企全幢大廈的水壓都不夠大,就算搵師傅來整,都令我唔係太滿意。今次用600幾蚊(希望無記錯),就改變了我的人生!佢只需好低的水壓,水流都可以好猛,比一般花灑頭的水勢高兩倍,沖涼更爽!

因為字數有限,未能介紹全部戰績,至於「小顏」,即係「細面」療程,不能三言兩語咁講,留待下期繼續。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭