【聲明】港生活網站並無進行電話推廣活動

Esther Wong
Esther Wong

真係愈亂愈有機?

發佈時間: 2019/11/05

2天前

社會前景未明,好多客戶都煞停projects,又或大Cut筆直,大中細的廣告公司均大受影響。

有廣告人發表「可能」要退休之告白,有廣告公司向不順眼又高薪的員工開刀;最估唔到的,有人苦海求生,踱了一條「絕」蹺,真係好絕︰《由廣告公司教你點樣唔用廣告公司》兩日雞精工作坊!教識做營銷孖屐停的客戶如何應付逆市,走出大cut廣告筆直但又要摵Target的困境。只需奉上HK$5,000,即可身懷一腳踢絕技,使乜再嘥錢畀廣告公司呀,Freelancers都慳番,自己OT自己頂!

這廣告一出,震撼廣告界,真係人人有「責」,係責難個「責」!D在臉書大罵︰「呢啲資深廣告人講兩句就收錢,惡果就要啲後輩受,年輕人已經做廣告做到心灰意冷!」L痛罵︰「食肥美血饅頭推廣告人落火坑,搵錢手法層出不窮!」M貫徹其幽默本色︰「大饑荒來了,你們當割禾青。」有人笑食相肉酸,有人罵心地唔好……

我只係覺得,邊有客戶會搵自己笨㗎?先畀大嗱嗱5千蚊,之後仲要自己做晒佢?筆直無論幾少,都一定有廣告公司肯去接㗎啦。仲有,係咪太神化成件事呢?畀你係極濃縮蟲草雞精,都無可能兩日合共8個鐘,就學識寫策略、公關技巧、拍片剪接,管理Facebook、IG廣告……(太多未能盡列)嘩!跟住就可以一條龍DIY喎!遺毒係,個個以為神功上身,就算用廣告公司,只會更加挑剔更challenging︰「阿邊個唔係咁教喎!阿邊個明明話收兩蚊做到喎!」但聽聞好似又真係有好多人報名……「信則有」搵錢法則,歷久不衰!我呢啲女人仔聽到咩高科技太空海洋美容神仙Cream,7日見效,年輕10年,都即刻撲貨啦!班廣告人咁起哄,搞到我都想見識下,同行有無$0優惠㗎?不是二人「同行」,是指廣告同一行業的「同行」。

30分鐘前

人心亂,一切都失了常。一個5千蚊的廣告神人工作坊,可能已是香港現時最令人抱有希望的現實……

(本欄逢周二刊登)

撰文: Esther Wong 廣告創作人,「ManyMany More興趣小組」創辦人。
欄名: @實時生活