McCafé x 麥提莎 歎冬日限定熱朱古力

天氣轉涼，歎一杯暖笠笠嘅朱古力飲品，就最暖手又暖心！黛安知道，McCafé最近聯乘著名朱古力品牌麥提莎，即日起提供期間限定嘅「Merry Sweet-mas」系列，全新飲品仲選用Oatly朱古力燕麥奶，加上香濃可可粉調配，可可成分更高，入口更加香濃醇郁。

公關姊妹同黛安分享，今次全新系列夠多元化，好似「麥提莎熱朱古力」就以Oatly朱古力燕麥奶沖製而成，喺香濃順滑嘅熱朱古力上，以朱古力粉撒上聖誕老人圖案，夠晒節日氣氛；至於「麥提莎果仁朱古力咖啡」，朱古力咖啡就再加上夏威夷果仁風味，層次即時昇華；而2款熱飲仲會額外附上1包麥提莎朱古力，可以歎一啖，食一粒，或者自製脆脆撒喺飲品上都得，一杯飲品雙重享受！

如果想擇選凍飲，McCafé一樣有得揀，就係「麥提莎芝士奶蓋朱古力」啦！呢杯新口味以歐洲同新西蘭芝士炮製而成嘅濃厚奶蓋口感豐盈，再溝埋麥提莎朱古力碎，將朱古力同芝士2種味道填滿口腔。再食埋「麥提莎脆脆朱古力蛋糕」，層層朱古力蛋糕之間夾着濃郁嘅焦糖慕絲同榛子慕絲，真係非常滿足！仲等咩？快啲去試齊咁多款啦！