逆市奇葩

最近去兩間餐廳食飯，看到出乎意料的景象，跟大家分享一下。同朋友去荃灣一間屋邨樓下的中式茶樓打邊爐。平時只有小貓三兩隻，更一度傳出結業的茶樓竟然爆滿要等位！點解會咁？難道是有名的食評家介紹了這裏？問侍應點解咁多人，才知道最近因為港鐵提早關門，好多平時會外出食飯的街坊都不願出遠門，反而更多人留在屋邨商場食飯，茶樓又是屋邨唯一有得打邊爐的地方，所以茶樓晚市比平時更旺！真是逆市奇葩！

有人歡喜有人愁，另一次去了天后一間有點名氣的日式餐廳，事前特意訂位，去到現場竟然有吉位。師傅表示最近無以前咁旺，好彩該店一直都主要做本地人生意，口碑又好，遊客少了對他們的影響沒有那麼大。

「業主唔肯減租已經慘，政府話會幫中小企又影都唔見！」師傅憤憤不平地表示。「好在仲有誠哥！」

又關誠哥事？原來李嘉誠基金會早前宣布向飲食業派兩億。只要是中小企、有合資格嘅食肆牌同商業登記，就可以到www.lksfsme.hk網上遞交申請，申請成功就可以拿到60,000「應急錢」。誠哥不愧係超人，話做就做，為飲食業帶來一陣及時雨。

（本欄逢周一刊登）