【聲明】港生活網站並無進行電話推廣活動

Esther Wong
Esther Wong

魑魅魍魎

發佈時間: 2019/11/12

N年前

驛馬星強,常常出門旅遊或公幹,住過很多酒店,遇過很多怪事。事後說起,嚇一餐笑一餐,只是當時已惘然。

多年前的越南河內集體撞邪事件簿是共同回憶,徐大導領軍出發到當地拍攝銀行廣告,我負責創意當然亦步亦趨。五星級酒店其實幾有style,房間內放上一隻竹蜻蜓小禮物,非常別致。大功告成check out的那一天,全隊crew連演員坐在大堂閒聊等上車,一個二個才夠膽爆料,原來各有各靈異遭遇。

高大有型的男主角房間晚晚「被」開Party,好嘈!一早醒來,放在椅子上的衣服行李全被掃晒落地……我的製片同事坐在床上看電視,床尾忽然「壓」了一壓,就像有「人」坐了上去一樣……徐大導就晚晚發噩夢,擾亂心神……我就每到半夜就有「人」大力撞門,好像醉酒一樣,撞完一次又一次,由於力度太強,我真的走去門孔窺看一下外面,只見整個走廊空無一物!Very閃靈!

助導F原來一早收到風,原址是監獄,已隨身攜帶聖經!徐大導住落已察覺有異,打算搬去另一間酒店,但其同事又嫌超支,寧願閉口「死頂」,怕蝕錢多過怕鬼!最堅的,其實是幾日無出聲嘅我哋,一心做好條廣告片就OK。當時在酒店大堂七嘴八舌分享「驚」歷的情景,仍然歷歷在目。

明明恐怖事,唔知點解講得好興奮好好笑。可能我地呢啲做廣告嘅,也算是撈偏門,個腦應該都偏偏哋,不按常理出牌,鬼咁低能,鬼咁癲!

3個月前

很多時候,其實都是自己嚇自己。試過深夜回家,「等埋!等埋呀!」直衝入電梯,冷不防兜口兜面見到一個女人長髮披肩,一身娘娘哋嘅紅裙,靜靜地望住我。嚇到我忍不住大叫「嘩!」再加一句粗口。見我舉止怪異,佢應該驚啲;我怯怯地望她多幾眼,才確認是人一個,是同樓住客……阿大姑,夜媽媽着成咁,好彩我沒有心臟病……

唉,香港短短數月忽成鬼域,集體「生怖」、「生怨」,真鬼怪,反而見怪不怪,講下都無壞。

(本欄逢周二刊登)

撰文: Esther Wong 廣告創作人,「MMM興趣小組」創辦人。
欄名: @實時生活