團結香港基金頒獎禮 表揚商戶推動社會責任

一間企業嘅成功，除咗要識賺錢之外，其實社會責任都相當重要。好似團結香港基金日前舉行嘅「商社共生」傑出大獎頒獎禮咁，就表揚咗3間分別喺推廣港式文化、解決安老人手短缺，以及促進傷健共融嘅商業機構，各自選擇喺賺錢之餘，結合社會同環境發展。

團結香港基金「商社共生」頒獎禮嚟到第二屆，今年由衞安有限公司、金茶王及娛藝院線，分別奪得「傑出創新大獎」、「傑出價值共享大獎」同「傑出共融大獎」。其中黛安最欣賞嘅，一定唔少得早前成為首間加設觀影輔助設施嘅娛藝院線，佢哋為視障、聽障人士或長者提供口述影像服務，令大家都可以齊齊享受電影嘅樂趣。

娛藝院線總經理譚偉賢（William）同黛安分享，其實香港有超過30萬視障或聽障人士，以前佢哋睇戲時往往需要一大班人包場，再請專人做口述，相當大陣仗；院線旗下4間戲院加設設施之後，只要電影公司本身有預錄聲道，就可以為有需要嘅朋友租借耳機，等大家可以喺免包場嘅情況下，享受到口述影像服務，同健全嘅親朋好友一齊睇戲，亦為公司帶來額外客源，真係一舉兩得。佢仲話，希望可以做到帶頭作用，鼓勵更多行家或者電影公司做多啲，真正促進傷健共融，仲承諾未來如果再開新戲院，都會加設相關設施！

至於衞安有限公司就結合科技，用人面識別技術，為老人院開發出一套防游走系統，減省安老行業人手短缺問題。

而金茶王自2009年起，亦透過舉辦比賽同開班，推廣港式奶茶文化，至今培養出近3,000名學生，為水吧行業帶嚟唔少具潛質嘅新血，更成功令港式奶茶製作技藝晉身成香港非物質文化遺產，認真出心出力，黛安覺得佢地獲獎真係實至名歸！