玩親子活動 歎美食佳餚 登天際過浪漫聖誕

踏入12月，聖誕氣氛愈來愈濃，黛安聽聞天際100香港觀景台由下星期一（9日）起，將推出期間限定嘅「閃爍冬日在天際」聖誕節日活動，到時大家除咗可以喺393米高空下，360度飽覽香港維港兩岸嘅夜景同璀璨聖誕燈飾外，仲有唔少工作坊同美食。

香港夜景睇得多，但由天際100俯瞰嘅維港景色始終與別不同。黛安知道，由今個月9日開始，天際100將為訪客免費提供4樣攝影法寶，包括串燈、散景濾鏡、水晶球同手提電筒，法寶各有特色，好似串燈可增添冬日浪漫氣氛；散景濾鏡就可將窗外嘅無數燈飾變成心形或雪花；交疊使用仲可為大家張相製造出獨一無二嘅懾人效果。

為咗加入更多節日氣氛，今個月15、22同25日期間，天際100仲會特別舉辦3場「天際家庭同樂日」，節目包括引人入勝嘅「神奇魔術師」學堂、「氣球造型師」訓練班、「創意繪畫工作坊」；仲有埋「STEAM聖誕老人鹿車製作坊」，等大家同小朋友可寓學習於娛樂。

節慶當然唔少得美食，Café 100 by The Ritz-Carlton將會推出連串應節美食優惠，包括即日起推出二人聖誕下午茶、英式鬆餅茶點等，前者提供3款鹹點小食同5款甜點，兩位用下午茶連天際100標準門票都係499元。另有4道菜聖誕晚餐、美酒套票買一送一優惠，認真超值！另外，深受歡迎嘅「2020跨年倒數煙火套票」，即日起於官方網站公開發售，套票包括天際100晚間入場門票乙張、連飲品乙杯，售價438元。