6大場景展出書中金句 重現小王子經典場景

聖誕將至，經過好多商場都已經換上聖誕新裝，其中黛安最鍾意就係尖沙咀The ONE嘅Le Petit Prince（小王子）主題展。你知道嗎？《小王子》呢本法國經典文學作品至今已喺全世界銷售超過兩億冊，世界各地都有小王子嘅粉絲。

今次The ONE係全港首次打造以聖誕造型亮相嘅小王子聖誕裝置，將書中經典嘅人和事重現眼前，拼湊出6大拍攝區，包括小王子最心愛嘅玫瑰、好朋友狐狸、可愛綿羊等，現場仲引用書中多句發人深省嘅金句，一邊打卡、一邊細味，格外有意思。

而將軍澳東港城則變身LITTLE TWIN STARS冬日森林，場內豎起6米高聖誕森林城堡，大家唔止可以入去玩糅合光與影嘅體感互動遊戲，仲可以喺城堡內嘅期間限定商店，搜羅獨家限定產品送畀朋友做聖誕禮物。

至於同區嘅將軍澳中心就喺中庭起咗一間帕丁頓熊聖誕樹屋，展示歷年珍貴精品，好似出產自70年代第一代Gabrielle Designs、附有作者Michael Bond簽名嘅帕丁頓熊限量版公仔等。同場仲有免費閱書天地，擺咗多本Paddington經典故事書，一家人可齊齊睇。