聖誕節的味道

每年11月尾我就會開始預備定聖誕花和樹，將屋企掛滿聖誕燈和裝飾，咁樣就會覺得好浪漫、好幸福了。唔知你有無發覺，聖誕真係一個有好多味道嘅節日，溫暖的肉桂、薑餅；莓果甜香；清新的雪松；柑橘清香等等，呢種味道令人深深感覺到聖誕節的來臨，那份微微的歡樂自然就湧出嚟，這感覺真美好。

今年聖誕市道不景氣，原本我都孤寒，諗住唔買真樹放在家中，卻不捨得那份滿室松樹的溫馨味道，終於都大破慳囊買了聖誕樹。當每天工人姐姐在底部加水保濕，屋內就會散發森林的氣味，令人有振奮、清新和提神的感覺，所以物有所值。

另一種聖誕味道就是丁香玉桂了。每逢聖誕我必定要飲Mulled Wine聖誕熱紅酒，將自己沉澱在這溫暖幸福的味道裏。說到Mulled Wine熱葡萄酒，據說起源於羅馬，當時的羅馬人遍布歐洲，用他們帶來的葡萄酒作為貿易交換。現今在英國、奧地利、德國、挪威和瑞典等國家非常受歡迎，可說是12月份的應景及傳統必備熱飲。12月是聖誕佳節，在市集中總可以看到有Mulled Wine熱葡萄酒供應，在歐洲的寒冬，有許多國家不管在市集或酒吧都可以找到。其實自己在家也可以自製，只需加入肉桂、蜂蜜、丁香、八角、檸檬和鮮橙切片；如果想酒精濃度高一點，可加入白蘭地。

兩手捧住杯Mulled Wine，先合眼聞一聞再飲，真係即時感到愛在心內暖！

仲有一種令人好開心的味道，就係薑餅曲奇了。餅中夾雜着豆寇粉、薑粉和肉桂粉香料的香氣，加上小小薑餅人面上呈現可愛滑稽的表情，真令人食得好開心㗎！

聖誕的味道真的好豐富，希望大家都能感受到這份節日氣氛，預祝大家聖誕快樂！

（本欄逢周四刊登）