日本頂級草莓禮盒 港商$10.6萬投得

港人曾喺日本競投過巨型吞拿魚「日本一」，日前有本港水果批發商「新利欄鮮菓批發有限公司」夥拍日本水果出口商，喺日本「大阪中央卸壳市場」成功以150萬日圓（約10.6萬港元）競投本年度最頂級質素、一盒3色士多啤梨，包括古都華、淡雪及白珍珠嘅特別版矜貴禮盒，創士多啤梨拍賣歷史紀錄。

黛安聽公關姊妹講，呢款士多啤梨禮盒係2017年先開始出現，連續3年獲日本包裝技術協會食品包裝部門大賞Nara Strawberry Lab出產，佢哋花兩年先培植出全日本最頂級質素嘅士多啤梨。今次拍賣嘅士多啤梨飽滿鮮甜多汁，仲特別包裝成3層box set禮盒，內有36粒古都華、36粒淡雪同36粒白珍珠，合共108粒士多啤梨。今年全球限定少過100盒，因為要求嚴格，非常珍貴。

黛安仲知道Nara Strawberry Lab希望藉住今次拍賣會，啟發年輕一輩明白努力係有回報，只要用心種植，不斷精益求精，農業仲有好多可行性，亦鼓勵年輕人投身農業，為日本水果領先地位盡一分力。