擺明玩嘢!

發佈時間: 2020/01/07

擺明玩嘢!

3天前

所謂Crossover跨界聯乘,明明各有品性、不同類型,係要走埋一起,真係要好smart好揀擇,才可愉快地win win。隨便Crossover,好易Gameover。商業合作如是,交朋結友亦如是……

最近真係估佢唔到而做出來又幾成功的,是上海麥當勞x Alexander Wang好玩嘢的黑金時尚系列︰賣人民幣5,999的野餐黑藤籃,有專屬number,全球只得300個,初初見到,忍不住大叫︰「唔係啩!」然後記起時尚惡魔Anna Wintour一句︰"You either know fashion or you don't."要fashion得起,先要玩得起!

另外,仲有靈感來自麥記外賣袋的「堡包」,Tyvek環保物料製造,又幾實用,放得落一部iPad;呢個我就夠膽carry喇,拎住去中環邊歎咖啡邊趕稿!今次客戶真係深明大義,沒有「LOGO最大」的歇斯底里症候群,個金色M字細細隻好低調,只係靜靜地放埋側邊。

「大蹺歸功於客戶,我哋負責推廣執行。」其廣告集團超高層C小姐話︰「反正金拱門已成為集團的花名,不必自己shame自己,金都可以做到唔娘!」啱!唔怕你笑,發奮最緊要!

2星期前

另一個Crossover很啱我口味的,是九龍倉長沙IFS國金中心x勁紅的日本Be@rbrick,除了於聖誕節玩大型裝置和活動,更設計了一款限量版小龍蝦Be@rbrick 400%公仔珍藏品,正呀喂!我成屋都係佢,又多一款儲成一家人喇!IFS真係夠晒On Trend,又識得加入當地文化元素,玩味十足!做人做brand不能只係得把口自吹好型好arty好善良好專一好乜好物,What you do is Who you are!明未?

1小時前

Fashion我識條鐵咩,但我識得欣賞啲idea夠玩嘢,又真係做到嘢;能夠完美落地實現,從來不易,值得鼓掌呀!

(本欄逢周二刊登)

撰文: Esther Wong 廣告創作人,「MMM興趣小組」創辦人。
欄名: @實時生活