【聲明】港生活網站並無進行電話推廣活動

陳淑蘭
陳淑蘭

高人的遠見

發佈時間: 2020/01/16

有一位我非常敬重的高人契爺,剛於上星期80大壽,借今期專欄祝福他萬壽無疆。

你可能認為他是我契爺,又不是你哋嘅契爺,關大家甚麼事?其實他對香港有些少影響。之前發生沙士後,香港經濟大幅下滑,他有份出謀獻策開放中國自由行來香港,這個提議至少真的幫到香港經濟,所以都有些關香港人事。雖然他沒有六呎高,但他絕對是高人。「有高人之行者,固見負於世;有獨知之慮者,必見驚於民。」「高人,過人也。」

大約20多年前,大家對感冒視若無睹時,我契爺已經非常緊張感冒菌。很多時候患癌的病人都歡迎到他家中求醫,但他家門囗有一牌子寫着「患感冒者請勿入內」,可想而知感冒喺佢眼中唔係嘢少。我咁無知,喺當時覺得契爺好誇張,感冒勁過Cancer?唔係下嘛?當時佢仲同我講,遲啲香港好多人都要帶口罩出街。呢個畫面喺當時我真係想像唔到,更無諗過有搶購口罩嘅畫面。

講開口罩呢個問題,我好嬲嗰啲明知自己已經係傳染病帶菌者卻毫不遮掩咁咳嗽嘅人!超級討厭,就係因為呢啲人,我哋為咗要自保先要戴口罩,用嚟防呢啲自私無公德心的人!

顛倒是非,你一定聽過,意思係將錯嘅講到好啱,將啱嘅講成錯;黑白混淆,令界限模糊。咁顛倒陰陽又係乜呢?

契爺話︰將地下最陰嘅嘢,放喺地上或天上;本來喺地面嘅嘢,又將佢放到落最低嘅層面下,呢樣嘢其實係製造緊大自然混亂,破壞緊個世界,有一日就會爆發呢個後果出嚟。

我聽完契爺所講,呆咗,唔係好明白佢講緊乜;就好似佢20幾年前同我講,香港有日會人人戴口罩出街一樣。希望當我可以get到佢意思嘅時候,唔係我親歷其境之時!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭