【聲明】港生活網站並無進行電話推廣活動

陳淑蘭
陳淑蘭

價值60萬豪華餐單

發佈時間: 2020/01/23

近期我的烹飪能手姐姐甲要返菲律賓探親一個月,於是煮食呢個任務就落喺姐姐乙身上。姐姐乙炒嘅菜又濕又腍,日日提住佢要打醒十二分精神去炒,但依然毫無進步,依然咁難食!煮食呢樣嘢真係要有天份同有heart!雖然難食,但我都要食飯㗎!惟有每次食佢煮嘅餸時,睇住木村拓哉近期套神劇《摘星廚神》嚟送飯啦。

呢套日劇講木村拓哉點樣追求三星米芝蓮嘅一個廚神故事。劇中的美食拍得極之吸引,我一邊食住姐姐乙超難食、又油又濕又腍嘅菜,一邊睇住電視內啲正菜送飯,望梅止渴,麻醉自己嘅味覺。

喺現實生活裏,我都識得一位三星米芝蓮廚師,有佢哋嘅地位,必須非常有heart。就算平時,佢哋腦海入面時時刻刻都諗住呢樣食物可否配嗰樣食物,效果會點?

我天真地問廚神,係咪煮鮑參翅肚最貴?佢話十多年前,煮過一個大約60萬元嘅菜單畀四位客人,裏面唔係全部有齊鮑參翅肚。嘩!十幾萬一位不連酒水,究竟食乜可以咁貴?快啲公開餐單,唔該!

一、野生黑魚子拼冰鎮富貴蝦魚凍︰野生黑魚子乃天價食材,加上用八斤重嘅蘇眉魚起肉燉成魚凍,完全唔加魚膠粉;二、冬蟲草燉金錢龜:此味最貴係隻金錢龜,值20幾萬元;三、滷水獅頭鵝頭、白焯螺片;四、五頭日本吉品鮑魚扣花膠:日本五頭吉品鮑,成本都成二萬幾,仲要唔係一人一隻,係一人食半隻咋!五、陳皮薑絲蒸蘇眉嘴巴︰用30年陳皮蒸,所以好貴;六、炭燒松板和牛;七、白松露龍蝦燴麵綫;八、日本蜜瓜汁撞血燕。

以上餸菜全部貴在食材,真係畀我食咗都可能唔知咁貴。睇完呢個菜單,我唔奢望食到,只期望姐姐甲快啲返嚟,畀我食番啲唔太濕唔太腍嘅菜,我已經會好感動!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭