【聲明】港生活網站並無進行電話推廣活動

陳淑蘭
陳淑蘭

口罩財富指標

發佈時間: 2020/02/06

呢隻咁嘅土豬年,由2019年六月開始已搞到香港無日安寧,諗住就快farewell佢,好行夾唔送之際,臨走前再留低多一單豬屎。當時疫症仍未殺到,商務及經濟發展局局長邱騰華已預計香港經濟會出現滯後情況,當時3.2%的失業率尚未到最低點,話預計農曆年後會進一步轉差。今日除了所有與防疫有關的物資外,百業蕭條,人人足不出戶,經濟唔使局長再預測或分析,你同我都可以預見走勢會如何。眼淚在心裏流,欲哭無淚!

我想講,我哋好多香港人情緒都灰咗好耐,唔可以再畀呢隻土豬留低嘅蘇州屎遮蔽我哋嘅情緒。明天會更好,我哋即管喺沙漠中尋求下一啖清泉,有無喺呢個苦難中見到一啲陽光呢?

喺呢幾個禮拜,大家最重要其中一個大使命就係撲口罩,於是就有一個口罩財富指標出現。

儲備一盒以下︰屬於赤貧;二至四盒︰低下階層;五至十盒︰中產;10至30盒︰有錢佬;30盒以上係富豪。我喺群組收到呢個口罩財富指標,便自卑地告知大家我屬赤貧綫,只剩四個口罩。話口未完,即刻收到梁思浩嘅信息同我講︰「蘭子蘭子唔使驚,思浩喺大廳。我有充足嘅口罩,可以送畀你用,最重要知道你媽咪年紀大,所以唔使驚呀!」呢個時候千里送口罩,雖然物不輕,但情義重,非常窩心!原來平時得罪人多嘅我,一路都有一些天使在周圍保守住我,我真係既感動又感激,更加感恩。

阿Q啲諗,一切偶然背後都有其必然性,邊度有危險,邊度就有機會。每一次大波折,就有一批新人發圍。好多人而家唔去街市買餸,開始發掘上網買餸的方便,我相信可能有更多新里程碑會出現!馬雲亦係沙士後見到民生有所改變而創立淘寶。願天佑所有人平安,令我們快快迎接光輝明天!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭