楊美儀
楊美儀

抗疫重要武器

發佈時間: 2020/02/07

抗疫重要武器

甲︰「睇完星期三你嘅專欄,我真係覺得你好夠薑!」我︰「你點知㗎?我真係食好多薑㗎!中醫話唔可以三日唔食薑,所以我已經好多年都無感冒啦!」甲︰「我話你呀!喺街被人撩你開片,你竟然都仲一個人四圍騰!橫掂你四圍騰,幫我撲啲口罩喇!」

我︰「唉!一窩蜂去搶口罩,搶到好貴。漂白水、廁紙都搶得一餐,去打仗即使具備武器,都要有強健嘅體魄才能夠打勝仗㗎!要對抗病毒,首先要強壯自身,食薑可以強身健體,提高你身體嘅免疫能力。相傳楚漢相爭時期,漢高祖劉邦征戰河南,身染瘟疫,久治不癒,就係靠飲蘿蔔生薑湯痊癒的。是堅定流就唔知,但每次我作感冒我食薑就無事,萬試萬靈。食薑令你身體提高免疫力,就肯定堅過石堅!」甲︰「中國人藥食同源好有智慧。」

我︰「虛寒是萬病之源,要保持體內的火不要滅。我愛吃天然生薑,或泡杯薑茶暖身,提高免疫力。薑的療效包括︰止咳化痰、解毒殺菌、消炎鎮痛、活血壯陽、防暈止嘔、健胃脾、助消化、去腥除臭、降血壓、血糖、血脂、抗癌、抗衰老、瘦身養顏!好處數之不盡,簡直多才多藝。」

甲笑哈哈︰「好似你喎!那麼,哪些人不能吃薑呢?」我︰「陰虛火旺、邪熱亢盛的傢伙、通街撩交嘅、已經躁底嘅,對於薑,最好還是不要惹好了,尤其是老薑。薑愈老,所含的薑辣素越愈多,辣薑驅風邪,對抗病毒、抑菌能力就更強。(笑)竟然有人膽敢在光天化日下挑釁我?我夠辣,託賴,百毒不侵!」甲捧腹大笑,口沫四濺︰「真係畀你笑死!」我︰「喂,小心你啲口水呀!」甲尷尬地說︰「呢個時勢好需要呢種幽默吖嘛!」

我︰「小時候我揹住相機去九龍公園防空洞探險,老竇話我膽生毛。個膽有無毛我就唔知,但係用薑摩擦頭皮可刺激毛囊令毛髮生長,又真係得㗎喎!」

(本欄逢周三、五刊登)

撰文: 楊美儀 美國認證專業美學家、 HerbalGram創立人、大韓民國忠清北道榮譽大使 angela@herbalgram.us
欄名: 緣來有美