善心人贈千個口罩 深水埗明哥轉送基層市民

常言道「患難見真情」，武漢肺炎疫情嚴峻，黛安見到本港口罩供應喺農曆年假期後仍然好緊張，各區只要有口罩賣嘅地方，就會有好長嘅人龍排隊。黛安知道多年嚟喺深水埗等地向基層派免費飯、人稱「深水埗明哥」嘅陳灼明，最近就收到善心人士送上約1,000個口罩，佢決定全數送畀獨居長者同露宿者等有需要人士，真係好有愛。

黛安噚日同明哥傾電話，佢好感觸咁話，唔少基層市民，好似獨居長者同露宿者，真係連一個口罩都無，所以好感謝有心人嘅送贈。呢批口罩喺近日已透過義工送畀有需要人士，包括露宿者、住公屋嘅獨居長者、已登記領飯市民，以及部分經陳葒校長送畀有需要嘅學生等。

明哥又話，香港疫情雖然不明朗，但「北河同行」堅守支援基層生活的崗位，所有派飯活動將如期舉行。但為咗減低疫情傳播風險，所有派飯活動暫時都唔會安排其他義工團體参加。黛安覺得香港真係好多有心人，希望疫情快啲完結，大家可以恢復正常生活。