【聲明】港生活網站並無進行電話推廣活動

黛安
黛安

港設計師創環保品牌 立體改造 舊衫升級

發佈時間: 2020/02/10

近年速食時裝文化盛行,黛安就覺得唔係太環保。其實追求時尚都可以保護環境㗎,好似香港設計師徐逸昇(Angus Tsui)自2014年創立個人同名品牌以來,除咗設計有個人風格兼且前衞外,仲講求可持續發展,嚟緊仲有體驗工作坊,教大家將舊衫升級再造!

聽公關姊妹介紹,Angus設計嘅時裝,旨在傳達兩大宗旨,包括如何保護世界,以及如何超越世界對我們嘅期望,作品呈現出嶄新嘅色調、外形同風格,亦實踐可持續發展嘅理念。除咗品牌設計系列,佢仲成立咗環保愛心企劃ANCares,經常同各大品牌合作,籌辦以可持續發展為主題嘅工作坊、研討會同展覽等。

黛安知道,Angus嚟緊3月5日會係佢個工作室舉行一個立體花紋製作體驗工作坊,為一班傳媒朋友介紹品牌最新系列服裝之外,仲會教大家用傳統罩衫製作技巧,以及一啲簡單縫紉方法,利用個人嘅舊衫製作出獨一無二嘅立體設計,將平平無奇嘅舊衫升級再造,參加工作坊嘅傳媒朋友,都可以將自己製作嘅完成品帶返屋企,黛安都好想去開下眼界啊!

香港設計師徐逸昇(Angus Tsui)

撰文: 黛安 消息特靈八卦公關
欄名: 八卦名利場