【聲明】港生活網站並無進行電話推廣活動

黛安
黛安

李嘉誠基金會捐$1億助武漢抗疫 屈臣氏贈15萬口罩予老友記

發佈時間: 2020/02/11

最近大家都為武漢肺炎疫情搞到好擔心,黛安收到消息,一向都關注社會公益嘅李嘉誠基金會日前公布捐款1億港元,支持武漢抗疫。公關姊妹同黛安講,武漢前綫醫護為咗拯救病患作出無私奉獻,基金會決定透過中聯辦賑災專戶,捐款支援當地前綫醫護。原本基金會計劃將捐款同防疫物資一併發放,但籌措同組織物資運送具挑戰性,因此決定捐款行先,物資再後補。

基金會又話本港醫護前綫亦都努力守護緊香港,基金會正盡努力喺全球搜尋醫護物資,為本港醫護人員紓解燃眉之急。

另外,長和旗下嘅屈臣氏集團噚日就喺fb宣布,將捐贈15萬個口罩畀有需要長者。

而為免公公婆婆要通宵排隊,今次屈臣氏就透過4個社福機構派發口罩,包括香港基督教女青年會、聖雅各福群會等,口罩將分配到10區,包括長者人口最密集嘅區域深水埗及黃大仙等,令更多長者可以直接受惠!

因為口罩供應有限,為咗惠及更多老友記,義工隊會將盒裝口罩分成小包,由團體直接分發到各區老友記手上。黛安真係好多謝香港有咁多善心人士關顧基層同長者嘅需要,希望疫情早日過去啦。

屈臣氏送贈口罩詳情

負責派送機構︰聖雅各福群會、香港基督教女青年會、香港基督教服務處、循道衛理楊震社會服務處長者服務部駿薈計劃

數量︰150,000個

地區︰深水埗、觀塘、油尖旺、黃大仙、新界北、荃灣、柴灣、灣仔、北角和南區

撰文: 黛安 消息特靈八卦公關
欄名: 八卦名利場