公益金 新世界 卓悅 出錢出力 齊心助基層抗疫

依家疫情緊張，香港唔少機構及商戶都好關心市民。黛安知道，香港公益金噚日宣布撥出$1,000萬，成立為期3個月嘅「公益金及時抗疫基金」，支援因今次疫情遭受突變嘅個人或家庭，目標對象喺做酒店、旅遊、餐飲、運輸同零售業嘅僱員，以及需接受檢疫隔離而影響生計嘅香港居民。有需要人士可按居住地區致電批核中心，聯絡社工查詢申請。

另外，卓悅噚日亦將1萬個口罩同1,000包消毒濕紙巾轉送受疫情影響嘅康美樓整座840戶家庭。新世界集團亦捐咗1,000個包括有口罩、潔手噴霧及消毒濕紙巾嘅「抗炎包」，畀「深水埗明哥」幫手分發予基層。有受惠嘅婆婆話屋企嘅口罩所剩無幾，好感激佢哋嘅善心。

新世界發展執行副主席兼總經理鄭志剛同黛安講，見到唔少基層市民連日來通宵排隊撲口罩，感到好難過，希望可以更到位咁幫佢哋；明哥就話好多謝新世界嘅支持，希望更多有能力嘅人可以去幫弱勢社群。另外，有慈善機構送口罩畀再生會派發，800個名額都係派畀65歲或以上嘅長者，每人可獲8個。

見到咁多人出錢出力關懷市民，黛安都好感動啊。

公益金及時抗疫基金詳情

運作期︰3個月

支援對象︰酒店、旅遊、餐飲、運輸、零售業僱員、受檢疫隔離影響生計人士

可獲援助金額︰每宗$2,000-$10,000不等，按家庭成員數目釐定

批核中心參考網址︰https://www.commchest.org/fundcentre_c.html