COVID-19新生活形態

發佈時間: 2020/03/10

COVID-19新生活形態

你話呢,從此以後,會不會全民進化至COVID-19新生活形態呢?

一、其實輪班制Home Office這做法不錯呀!何必一定要一星期五日,由早到晚黐住公司張枱,要老闆見到你在扮工先至算係返工?做廣告咁多年,尤其是創作部門,工作模式相對比較自由,早已身體力行這個道理。雖然未至於隔日返工,但只要帶住個腦,隨身有電腦、電話,邊度都有陽光,隨時都可以brainstorm!對份工緊張上心,必定會交足功課;做得好唔好,不必日日對住都好容易睇得到!彈性啲,平衡啲,工作表現可能再好啲。

二、網購終於成為主流習慣了嗎?平時好少網購的朋友現在全都轉晒上網購買日用品、叫外賣;我近日多了在家,也真的多了上網消費,剛剛上Farfetch買了COMME DES GARÇONS新品,再去Amazon買Alain de Botton的《The Art of Travel》,又方便又平啲,點忍到手!HKTV Mall二月的營業額高達4.82億!王維基話,零售商是時候改變思維及營運模式。True,有危先有機,做人不可以一成不變。

三、各行各業終於記番起咩叫「今時今日的服務態度」!店員笑容多了,不論買多買少都給你VIP優惠及禮待。餐廳提供搓手液是基本,門口量埋體溫是抵讚,去了銅鑼灣食街LadyM午餐,竟再進一步送上紙巾,讓你可放置口罩,三部曲做齊!就是細心!食物質素又好,之所以依然好好生意!

早兩日閒逛某曾經紅過賺過的名牌集團潮店,我拿起一個tote bag問︰「是人造皮嗎?」女店員笑笑口︰「點解你哋咁介意呢啲嘅?」吓!即係唔知啦!如此員工管理,難怪一向水盡鵝飛,疫境中應該會加快摺埋!

人的適應力及創造力不可低估!Welcome to COVID-19新生活文化!

(本欄逢周二刊登)

撰文: Esther Wong 廣告創作人,「MMM興趣小組」創辦人。
欄名: @實時生活