【聲明】港生活網站並無進行電話推廣活動

陳淑蘭
陳淑蘭

恐怖的群體免疫法

發佈時間: 2020/03/19

呢套電影雖然之前已經睇過,今時今日再睇番,對嗰份被感染的恐懼感受卻完全不一樣。

上星期六喺屋企,睇番2013年上映嘅韓國災難恐怖電影《流感》(The Flu),直情感覺自己置身其中,睇得特別投入,特別驚心動魄。故事主要講述一種由非法移民所帶來的致命流感在韓國盆唐區爆發後,令所有感染者於36小時內死亡,因而引發混亂;被隔離於疫市裏無法逃脫的人,開始掙扎求存的故事。

導演用特寫鏡頭,拍攝由病源帶菌者咳出的飛沫四處傳播病毒,喺呢個時候,呢啲人仲未知道要戴口罩。電影裏好多人咳嗽時都無掩住嘴巴,製造不斷蔓延嘅恐懼感。發病過程相當快速,一傳十,十傳百……疫情未有藥醫,惟有封城。

之前我睇呢部電影時,都無嗰份逃離疫區嘅無助感,但而家我身邊好多朋友嘅仔女正喺英國留學,正正就有戲內所描述嘅困在疫市裏不能逃出嘅惶恐,簡直活靈活現!

其實再睇番,現實仲得人驚過電影。戲中只係諗住犧牲一個市裏面嘅市民,但現實嘅英國,係成個國家嘅人民,嘩!

就因為英國政府認為只要國內達到一定程度的染病人口,讓更多人對新冠肺炎免疫,就可以製造「群體免疫」,降低病毒嘅傳染性。即使病毒往後捲土重來,疫情也不至於太嚴重,這對沒有免疫力者形成「保護網」。

要達到這個目標,英國6,700萬人口中必須有大約六成、即4,000萬人染病,長遠而言,愈多人染病愈好,並在痊癒後產生抗體,形成「群體免疫」。呢個方法名副其實係用好多條命換番嚟。問你驚唔驚?係咪現實仲恐怖過電影多多聲呢?

祝福英國市民!亦覺得香港人在香港,是身在福中。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭