7-Eleven答啱題目 送免費早餐

唔少醫生同專家都講過早餐非常重要，如果免費有得食就更加Good啦！黛安經常幫襯嘅7-Eleven，又有着數益大家喇，由即日起至29日，一連幾日舉行「醒醒腦筋大挑戰」，大家只要睇片答問題，答啱就有機會免費歎全新7仔早餐組合，總共送出10,000份早餐啊！

公關姊妹話，今次免費請大家歎嘅7仔早餐組合有3款，包括：「朝食三文治套餐」、「朝日飯糰套餐」同「朝氣麵包套餐」，款款都有唔同嘅食物同飲品選擇，可以任你自由配搭㗎。

玩法亦好簡單，只要喺推廣期間，每晚9點正登入「醒醒腦筋大挑戰」活動網站www.711campaign.com，根據指示完成挑戰，每日首2,000名得獎者，將會喺1個工作天內收到手提電話短訊（SMS），獲得「7仔早餐組合免費電子換領券」嘅連結，就可以換領指定7仔早餐組合1份。留意，免費電子換領券唔可以兌換現金，使用時亦須受有關條款約束；所有得獎者如下月30日或之前仍未兌換獎品，將作棄權論。