【聲明】港生活網站並無進行電話推廣活動

黛安
黛安

惠康全「惠」你 有需要者享優先服務

發佈時間: 2020/03/27

喺疫症肆虐期間,巿民對食品同日用品嘅需求急劇上升。最近黛安去超市購物,間中見到啲公公婆婆、殘疾人士買嘢,佢哋要同人逼或者排隊付款都幾辛苦。不過聽公關姊妹講,惠康及旗下特色超市,包括Market Place by Jasons、3hreesixty、Oliver's the Delicatessen、Jasons Food & Living,合共超過300家分店,由下星期三(4月1日)起,逢星期一至五,會為65歲或以上長者、孕婦及殘疾人士,安排優先購物服務。喺疫情下咁關心有需要人士,真係好貼心啊。

由4月1日起,惠康及旗下特色超市安排所有分店由開始營業時間起,到上午9時正為特定購物時段,畀長者、孕婦及殘疾人士可以優先結帳。公關姊妹仲話,店內職員亦會為有需要人士提供特別協助,好似幫手拎貨架較高位置嘅貨品,又或者將較重嘅物品送去收銀處。成個安排暫定實行到4月底(30日),到時會再根據情況睇下會否延長。

由疫情爆發以來,黛安知道惠康成個團隊一直都謹守崗位,仲加快運作令貨品盡快上架,令市民可以買到日常所需用品。惠康希望今次喺疫情下嘅特別安排,可以為18區內有需要嘅社群,提供更方便舒適嘅服務同購物體驗。黛安都好支持呢個安排,大家面對疫情更應該多啲包容同互助。

撰文: 黛安 消息特靈八卦公關
欄名: 八卦名利場