「地球一小時」熄燈讓地球唞唞氣

全球氣候變化問題嚴峻，黛安一向好支持嘅世界自然基金會「地球一小時」活動，上周六（28日）晚已順利舉行；全球有接近160個國家和地區嘅市民、企業及著名地標都參與響應，當晚8點30分起熄咗非必要嘅燈同電器1個鐘，以示對氣候危機同生物多樣性衰退嘅關注同承諾。

今年因疫情關係，香港舉行嘅「地球一小時」由往年尖沙咀海傍戶外活動，改為FB網上直播。香港有近4,500間公司、機構同大廈熄燈支持活動，超過100間中、小學同多個著名地標建築物承諾參與，其中「幻彩詠香江」滙演就暫停一晚；而青馬大橋、國際金融中心同香港文化中心等，當晚亦有響應齊齊熄燈。

世界自然基金會香港分會董事委員會主席何聞達話，簡單如熄燈同減少用即棄塑膠產品，已可幫助地球步向可持續嘅未來，大家要記住喇。