海洋公園發放動物大使短片 齊心抗疫

海洋公園自今年1月下旬起，因受疫情影響而暫停開放，黛安好掛住園內嘅動物。公關姊妹報料，原來海洋公園喺休園期間除進行徹底清潔外，亦好細心照顧各種動物大使，獸醫更為佢哋進行額外檢測，而家仲有網上短片可睇。

公關姊妹話，園內獸醫及動物護理員為部分動物大使進行嘅額外身體檢測，包括每日為雀鳥進行護理檢查；因鳥類嘅呼吸道較易受感染，企鵝護理員每日餵飼時，就會加入獸醫建議嘅維他命或營養補充品。至於人見人愛嘅海豹，每日除咗量體溫外，亦會幫佢哋刷牙同做口腔檢查。而水豚護理員就會定期為佢哋抽血作檢測。一系列嘅抗疫同動物護理程序，海洋公園都拍咗短片，近日仲上載咗至facebook及YouTube頻道，等大家喺屋企亦可以睇下呢班動物大使，同佢哋一齊抗疫！