今晚8點齊為醫護英雄鼓掌

由疫情爆發至今，最辛苦嘅一定係醫護及相關工作嘅前綫人員！佢哋日以繼夜同疫症搏鬥，照顧病人同守護我哋。呢啲無私奉獻同努力大家都有目共睹，黛安真係好多謝佢哋。所以太古地產愛心大使聯同其他機構，將參與今日（3日）晚上8點嘅「Clap For Carers為醫護鼓掌」活動，當黛安知道後，已經叫齊親朋好友記得今晚要參加！

大家無論身處何方，喺呢一刻都可以一齊為抗疫英雄熱烈鼓掌最少1分鐘，集結全港市民嘅掌聲，同佢哋打氣加油，感謝佢哋一直謹守崗位與無私付出。黛安相信，醫生同護士們一定會聽到我哋嘅心意。其實類似嘅感謝活動，最近喺歐洲多國都有人發起，而且造成很大回響，黛安肯定好多香港人都會踴躍支持。