【聲明】港生活網站並無進行電話推廣活動

黛安
黛安

新世界派1000萬個口罩 設35部口罩機嘟卡領取

發佈時間: 2020/04/07

新世界派1000萬個口罩 設35部口罩機嘟卡領取

口罩係防疫必需品之一,可惜供應至今仍緊張,唔少基層同長者都好徬徨。黛安最近收到好消息,指新世界發展本月底起將免費派發1,000萬個「Made in HK」口罩,佢哋會同8個非牟利機構合作,喺轄下指定中心設置自助口罩提取機,向預先登記嘅基層及弱勢社群派發輕觸式「口罩提取卡」,每星期「嘟」卡就可以領取1包(5個)口罩。

新世界發展執行副主席兼總經理鄭志剛同黛安分享,口罩係抗疫必需品,眼見不少市民頻撲及花費高昂買口罩,甚至有弱勢社群為慳錢而重用口罩,實在好心痛,所以今次為基層伸出援手,希望佢哋毋須活喺口罩匱乏嘅惶恐中。黛安了解過,新世界發展將陸續設置35部「自助口罩提取機」,免費派發口罩10星期至7月初,預計有超過4萬人受惠。

公關姊妹就補充話,自從新世界發展2月公布自家生產口罩後,首2條生產綫快將進行試產,另外2條生產綫亦將於5月投產。當全面生產後,估計每月可生產逾700萬個口罩;而喺4至6月期間,大部分自家生產口罩將用作捐贈用途,其餘供公司營運使用。黛安聽到有更多港產口罩真係好開心,尤其有咗呢啲「自助口罩提取機」,公公婆婆就唔使捱更抵夜排長龍咁辛苦了!希望其他好消息陸續有嚟。

新世界派1000萬個口罩 設35部口罩機嘟卡領取

新世界發展執行副主席兼總經理鄭志剛(右)早前到生產口罩實驗室了解生產過程。

撰文: 黛安 消息特靈八卦公關
欄名: 八卦名利場