地球好危險

發佈時間: 2020/04/14

地球好危險

2天前

現在的世界,真係好難理解……

朋友C在Facebook分享了在cafe歎咖啡的照片,是生活的日常,好平常。即刻有人問︰「呢間cafe,你『居然』仲去?」又有人即刻update不屑幫襯的原因……雖然可能是善意,但你一言佢一語咁去咄咄「提醒」,令C幾近崩潰。

我本來以為難道爆發了cafe確診群組?原來這個由日本人創辦的文青cafe品牌,早已被紅底上市集團接手,最近更爆出造假數醜聞。C向我激動狂呻︰「就算知道了這單新聞,去唔去也是我的自由,你哋有甚麼權力過界干涉?自以為企喺高地,隨意去質詢別人?……(下刪1,000字)」

我事不關己,腦筋當然比較清晰,態度比較隨緣,提議C毋須反應,若然忍不住的話,可以佛系回答︰「今日去,唔等於聽日都去;今日唔去,或者終有一天會去……最重要係,pardon me?我有約你哋一起去嗎?」可惜,幾位最終還是以動氣對罵,blocked人收場。

3星期前

廣告人R在Facebook開了一個Netflix劇集分享谷,寫明不談政治,不容辱罵粗鄙語言,一直相安無事,好多人的劇評和推介都好好睇好有用,我一直好捧場。早陣子,R只不過推介了周杰倫的真人show,竟掀起千層惡浪,惡言惡語一擁而至,並非只以劇論劇,而是牽涉到政治取態、人身攻擊。有谷友睇唔過眼,不斷投訴舉報,要求R列明更多rules;留言被刪掉甚至被踢走的人,氣憤難平,惡搞得更盡情……

R最終封存關閉平台,免得自尋煩惱,唉……真可惜。個地球真係好危險,唔單止有肺炎,仲有好多怨念廢言。

(本欄逢周二刊登)

撰文: Esther Wong 廣告創作人,「MMM興趣小組」創辦人。
欄名: @實時生活