疫情下的新發現

在新冠肺炎疫情下，大部分人都選擇留在家中抗疫。近排喺好多社交媒體上，見到好多人將home cooking post上網，發現平時唔多覺佢識煮嘢嘅朋友，都化身廚神。如果唔係呢個疫情，真係唔為意身邊原來有咁多廚神！連TVB都推出首個全網絡綜藝節目《疫境廚神》，只要將自己嘅撚手小菜上載至網站，公諸同好就有機會獲得獎品。

我唔係幫佢哋賣廣告，而係覺得呢個疫情真係改變咗以往社會嘅一啲框架同模式。好似呢個煮食比賽，無話一定要煮嘢好叻，佢話只要你識煮嘢就可以參加，即係話菜式出到嚟只要美輪美奐，就算入到囗難食到飛起，都有獎攞。世界真係開始變得更虛擬了。

人去到某個年紀，唔係個個都時刻追貼科技發展，但呢個疫情真係逼我呢個科技白癡都要識某啲科技點用。例如上星期六由Lady Gaga統籌的大型群星網上演唱會《One world: Together At Home》，就係因為疫情而衍生出嚟嘅演唱會新模式。表演者來自世界各地，各自喺自己國家嘅家中一齊獻唱，或一齊和唱，令觀眾在家中都可以睇到呢個演唱會，感覺好震撼。

呢個又係一個新方向、新改變。

我和朋友喺呢段時間為了安全而閉關，但寂寞難耐，想要熱鬧可以點呢？呢個時候，科技可以將那麼遠變成這麼近。一於叫齊班酒肉朋友，邊個得閒就開視頻，十幾個人，你一言我一語，猜枚暢飲，嘈喧巴閉，安全得嚟依然可以好熱鬧。雖然視頻呢種科技已存在了一段日子，但你我平時應該不常用，如今卻大派用場。

今次呢個疫情迫使我哋長時間要留喺屋企，你有無因為咁而發掘好多之前忽視咗，但原來一直喺身邊嘅情和物呢？

（本欄逢周四刊登）