疫情下的美國百態

朋友︰「我想提醒你唔好做好心，將你手頭上啲口罩去同人分享呀！你知唔知網上有條新聞片，一個中國人做好心，將啲口罩同美國鄰居分享，怎料有人皮膚敏感，成班鄰居一齊告佢啊，真係好人難做啊！」

我︰「你放心，我太了解美國人。啲同事話無budget食飯，我會大破慳囊請佢哋食三文治。食緊嘅時候佢同你扮老友，食完之後都係繼續要整死你，因為你工作太勤力威脅他的飯碗，資本主義國家是物競天擇定律，後遺症是社會冷漠無情。」她︰「等於收完救濟物資，就話要告要賠償囉。」我︰「美國教育重視學術，跟我們自小學習仁義道德的儒家思想不同，他們不懂孔子、孟子，只懂銀紙。」

她︰「美國確診人數突破百萬呀！嗰邊氣氛係咪好緊張？」我︰「唔係喎！大把人仲話要復工，唔復工無生活仲慘過死喎！又話無得睇NBA寧願死呀！」她︰「唔係嘛，咩人嚟㗎！」我︰「就係有呢啲人，先至會有呢啲總統囉！」她︰「佢哋真係唔知個死字點寫啊！」

我︰「老外梗係唔識個死字點寫啦！不是有句話︰生命誠可貴，自由價更高咩？戴口罩已叫美國人感到好大壓力。佢哋是外強中乾，唔單止荷包，亦包括佢哋嘅內心。」她︰「戴口罩又真係幾辛苦。」我︰「如果你抱住一個戴口罩是保護自己、保護他人的想法，你就唔會覺得辛苦，要視戴口罩為社會公民的責任。中國人連3年零8個月都可以捱得嘅，戴口罩又有甚麼大不了啊！」

她︰「千祈唔可以畀癲佬連任呀！竟然錢比人命重要。」我︰「據聞佢嘅民望上升喎。」她︰「都唔知咩世界，啲人反智。」我︰「香港有分別嗎？5月2日選民登記截止喇，你是香港人，作為社會的一分子，應把握投票選立法會議員的權利。你的一票好重要，唔投票，就唔好呻垃圾會又唔開會喇。」（本欄逢周三、五刊登）