印堂加隻眼？

好耐無睇新聞睇到自己笑成15分鐘。係，我的確係好曳，將快樂建築喺別人痛苦之上；但係呢單新聞，對唔住，我真係忍唔住笑……

話說台灣一名女子早前去紋身，本打算在額頭上紋一朵類似淺灰色的小眼睛或是小白蓮花，仲攜同心儀的蓮花圖畀紋身師參考。紋身師卻無視其要求，在過程中把她的額頭當畫布一樣亂刺一通。事主察覺有異，感覺紋身師刺的跟當初指示的不一樣，甚至感覺到對方已「完全失控」，隨即大喊「不要」、「停下來」、「你刺到我的臉了」、「我要照鏡子」，請紋身師停止手上動作，對方卻「沾沾自喜」繼續紋下去，最後事主額上被紋上「飛龍舞鳳」的「第三隻眼」，令她大感不滿，直言「刺完只想去死」（唔好意思，睇到呢度，加上想像力，我自己已經笑到咔咔聲）。

呢個新聞帶畀我一個重點，就係額頭是面相中最重要環節，直接影響到一個人的運，額高飽滿者代表有頭腦、善於思考，創作力和幻想力也很強，可憑聰明才智做出好成績並帶來名聲；額形廣闊，邊城位高而廣者，易得貴人扶持，故有貴人額之稱；額闊且沒有紋侵痣破，能得到雙親關懷，家境富裕，無論讀書或事業發展都能爭取好成績。

除此之外，我哋時時都聽到印堂發黑代表時運低，可想而知印堂對個人運程的重要。印堂位於兩眉之間，闊度最好達兩隻手指位，以無紋無破為佳，你在咁細嘅空間仲要加隻眼？運程真係唔使算命師傅講，我都肯定知唔會有運行啦！所以大家記住︰自求多福，至少咪亂咁喺個額頭搞搞震！

（本欄逢周四刊登）