港鐵車廂裏的驚人場面

甲︰「每日搭港鐵上班，你知我最怕睇到乜嘢場面」？我︰「擋住車門，唔畀車門關上，開唔到車，阻你上班嘅場面？」甲︰「港鐵車廂裏有太多令人意想不到嘅畫面呀！」我︰「你唔係咁好彩遇到嗰位愛強吻人哋腳板底嘅怪男啩？」甲︰「的確，香港地無奇不有！我最怕睇到女人幫男人唧暗瘡嘅畫面，好噁心！但係呢個畫面以前經常都睇到，最近人人戴口罩，已經不復見。」

我︰「一對熱戀中嘅情侶係目中無人嘅，我好明白暗瘡友嘅無奈，女人好鍾意乜都管，又好叻挑剔人，就係頂唔順自己男人嘅暗瘡篤眼篤鼻，所以要立即除之而後快。我亦見過唔少呢啲畫面，點解佢哋唔覺得污糟﹖手指好污糟，咁樣唧暗瘡肯定會令炎症加劇，而且會令毛孔粗大。」

甲︰「手指好污糟，硬幣就更加污糟。你有睇過嗰啲麻甩佬用兩個硬幣拔鬚根嗎？」

我︰「有，太多喇！佢哋都係一副自得其樂嘅樣，最近真係再無見過，所以戴口罩人人自律又衞生係好事。希望今次新冠肺炎的慘痛經歷，大家對公眾衞生嘅意識能大大提高。記得一次有位阿叔技術太好，玩弄硬幣嘅手法太熟練，每次都能拔出鬚根，然後彈一彈，把鬚根成功彈走，手勢之純熟，令人驚訝！自此，當坐喺隔籬嘅乘客攞出兩個硬幣，我已被嚇跑100公尺唔使透氣。」

甲︰「即係咩？」我︰「走得快好世界囉！」甲哈哈大笑。

我︰「鬍鬚係毛囊裏面毛乳頭生長出嚟，鬍鬚要刮，唔應該拔。因為拔會損害毛囊、皮脂腺。輕微嘅會發炎，嚴重嘅會引致腦膜炎，或者膿毒敗血症。」

甲︰「好驚人啊！寫出嚟，好有阻嚇作用呀！畀嗰啲手痕友知，問佢哋怕未！」

我︰「嚴重嘅可能併發鼻側角嘅化膿性血栓性靜脈炎，甚至可向上蔓延到眼靜腺，如果繼續蔓延到顱腔裏面嘅海綿靜脈竇就會引發腦膜炎，唔係講笑㗎！」

（本欄逢周三、五刊登）