新世界口罩機下周一投入服務

香港新冠肺炎疫情雖然漸趨緩和，但大家記得要繼續戴口罩，絕對唔可以鬆懈！黛安知道，新世界發展早前自設廠房生產嘅「香港製造」口罩正式面世，連同全港首創嘅「自助口罩提取機」，下星期一（25日）就會陸續投入服務，約有4萬名基層市民受惠，佢哋只要憑卡嘟一嘟，就可以10星期免費攞到口罩喇！

黛安了解過，新世界早前發起呢個「#LoveWithoutBorders行動」，就係同17個非牟利機構合作，分兩階段喺佢哋轄下嘅37間指定中心設置「自助口罩提取機」，並向一班預先登記嘅合資格基層及弱勢社群，派發印有二維碼嘅「口罩提取卡」，5秒即可拎到一包共5個口罩，為期10星期，真係好有心。

三子之母嘅May透露，疫情初期因為買唔到口罩，試過10幾日都無出過街，到依家口罩只剩番唔夠1盒，1個口罩要戴足5日，用完就掛喺鐵閘吹乾，第二日再用。如果斷咗條帶就用針綫縫番再用，盡量慳得就慳！今次好彩有新世界幫手，終於可以為屋企小朋友做好復課準備！黛安聽完都好感動。