冷氣慳電貼士

踏入5月，點解已經熱成咁？一唔開冷氣，成身即刻黐𣲷𣲷，但長期喺冷氣環境下，我又感到好似有啲冷氣病特徵，例如水腫、周身骨痛、頭暈頭痛、皮膚非常乾燥……於是冷氣開下又熄下，feel到太熱時又開番。點知上星期先至喺同事口中得知，冷氣又開又關，非常嘥電！我即時晴天霹靂！原來一直蠢咗又蝕咗！原來開冷氣想慳電，都係一門學問。開冷氣慳電四招︰

一、溫度調高1度，可以省電10％：通常室內冷氣最佳溫度，應該設定喺25至28度；當將冷氣調高1度，大約可以省電7至10％左右。

二、風扇配合冷氣降溫係一個非常好嘅方法：開冷氣機同時開風扇，不但可以獲得比冷氣設定溫度低1至2度的感覺，同時仲可以幫助室內空氣流通。

三、瞓覺時將冷氣溫度調高，起身之前一個鐘頭熄冷氣，又可以慳一慳。

四、仲有原來保養冷氣機得宜，都有效慳到電。每隔兩星期清洗冷氣機隔塵網、進氣口及出風口，都可以減低每次開冷氣嘅氣流受阻，令冷氣達最高嘅效能。

當我好似好醒咁，同我澳門嘅姊妹分享點樣慳電時，佢話畀我聽︰我唔使知住，遲啲你先講我聽啦！因為防疫抗疫期間，澳門政府為紓解居民居家的水電費用開支，會免收住宅用戶3個月水電費。而中小企商戶亦有企業商號水電費補貼措施，水費補貼上限為每戶每月3,000澳門元，電費補貼上限則為每戶每月1萬澳門元。香港都唔差﹐都補貼住宅用戶一年2,000蚊電費。

（本欄逢周四刊登）