【聲明】港生活網站並無進行電話推廣活動

陳淑蘭
陳淑蘭

用茅台洗腳?

發佈時間: 2020/07/09

用茅台洗腳?

呢期有好多內地股票升得好勁,而其中貴州茅台股價續創歷史新高至1,600元一股。可惜我唔識買股票,無得做富翁。

幸運地我認識有朋友收藏好多靚茅台,仲好慷慨咁攞出嚟分享。雖然無幸賺到茅台嘅股票,但都叫做有幸品嘗下佢嘅好酒味。其實我只係喜歡飲香檳,咁濃烈嘅酒,我真係未夠班識得欣賞,但既然有機會試,唔飲我就笨。

茅台杯細細隻,乾杯後一飲而盡。液體醇厚豐滿,直滑落喉嚨,跟住我就feel到內臟的熱力節拍滾來滾去……

茅台產於貴州省仁懷市茅台鎮,係最早嘅大曲醬香型白酒。茅台酒嘅顏色清澈透明,香味醇厚、軟綿,以清冽甘爽入口,持久嘅香味聞名世界,被稱為「中國國酒」,因此有好多人收藏,變成有投資價值嘅「軟黃金」。

咁貴嘅酒,仲有洗腳價值。唔係吖嘛?邊個咁奢侈?咁敗家?

話說喺1935年,紅軍長征進入貴州以後,一直處於奔波狀態。佢哋喺四川、貴州、雲南三省,不停地實施戰略轉移。由於長途跋涉,加上激戰連連,不少紅軍渾身是傷,即使無受傷嘅士兵,腳上都磨到起水泡。而長征途中又缺醫少藥,不少紅軍士兵都帶傷前行。

茅台酒不僅芳香醉人,亦有舒筋活血、強身健體嘅功能。當紅軍戰士到咗茅台鎮後,就用打土豪沒收返嚟嘅茅台酒療傷、浸腳;之後果然能恢復行路的疲勞。因此茅台酒洗腳後的奇效,大家都稱讚。

不過話時話,呢個茅台洗腳嘅故事,雖然被風傳甚廣,但究竟是真是假?

1943年,時任國民參議員黃炎培對此傳言,喺一幅畫有茅台酒嘅畫作上題詩︰「喧傳有客過茅台,釀酒池裏洗腳來。是真是假吾不管,天寒且飲三兩杯。」

今時今日,肯定係真嘅,就係如果我攞朋友嘅茅台嚟洗腳,朋友一定打跛我隻腳!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭