【聲明】港生活網站並無進行電話推廣活動

陳淑蘭
陳淑蘭

特別的慶生

發佈時間: 2020/07/23

特別的慶生

近來你有無發覺個天特別藍天白雲?你望住個天,有讚嘆嗎?我有。讚完個天靚,之後就嘆氣了。這美麗,係用我哋每個人失去自由的痛苦換來的。

這樣的天朗氣清,理應空氣好清新,但試問你我在街上,能呼吸到嗎?我哋只係聞到口罩內,自己呼出嘅臭口氣!

我啱啱喺上星期過我嘅生日,雖然充滿了朋友們嘅愛,但呢個庚子生日,亦令我百般滋味。

第三波新冠肺炎在香港接近失控式爆發,政府在7月15日凌晨開始,食肆晚上6時後只許外賣。而妹妹和妹夫一早已約了我7月14日晚上慶祝。他們都同我講話好好彩,能趕得切在最後限期前,去食「最後晚餐」,哎呀,啋!

不過老實講︰嗰下我嘅感覺,又真係有份食完嗰餐,唔知幾時先可以出街食晚飯,有份沒有明天嘅感受,又再啋!生日流流講呢啲,大吉利市。

隔日,朋友們到我家為我慶祝,當管理員見到我下午買了一堆食物回家,他們都用不安嘅眼神加緊張嘅語氣問道︰「陳小姐,今晚喺屋企請客呀?」而我就帶住罪疚嘅表情,好細聲咁答︰「係……呀。」

星期五舊同學安排了喺佢屋企為我慶生,平時我去佢屋企黐餐,佢屋苑都會有好多位泊車,嗰日可能大家都不能外出吃晚飯,於是好多人都在家款客啩,車位全滿,奇景。

而正日原先一早約好一大班朋友,同我食晚飯慶祝。晚飯?當然唔可以啦。結果最後,cut咗好幾位朋友,終於連我自己在內,改了共8人吃午餐。8個人?過了限聚人數,犯法喎!我肯,我啲朋友都唔肯啦。我哋係book了兩圍枱的。坐下呢張,又再同人換位坐去隔籬嗰張枱,走來走去。影合照時亦要快快脆脆,好似偷嘢咁鬼祟,拿拿臨影一張後,即刻散水……過生日過到咁,真係別有一番滋味。

庚子年,果然係特別嘅一年。我嘅生日願望係︰希望平安大吉,身體健康咁順利過度呢一年。By the way,我呢個禮拜,已經開始乖乖留喺屋企,同人群隔離了。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭