新世界捐30萬兒童口罩 助基層抗疫

兒童口罩供應一向好緊張，黛安聽聞新世界發展正式生產兒童口罩喇，其執行副主席兼行政總裁鄭志剛宣布，將率先將自家製30萬隻兒童口罩送畀基層小朋友，真係好有心。

新世界首批30萬隻兒童口罩將捐畀多間非牟利機構，例如浸信會愛羣社會服務處同協康會等，連同透過「自助口罩提取計劃」同其他捐贈渠道，至今已同接近60個非牟利機構合作，向基層及弱勢社群捐贈約500萬個由集團生產嘅口罩！有關計劃原本為期10星期，因近期疫情反覆，現在延長至今年10月底。

新世界發展執行副主席兼行政總裁鄭志剛話，基層家庭同小朋友礙於資源及防疫物資匱乏，承受好大感染風險，更要利用企業嘅力量幫助佢哋。