【聲明】港生活網站並無進行電話推廣活動

陳淑蘭
陳淑蘭

小心引火自焚

發佈時間: 2020/07/30

小心引火自焚

好熱!非常熱,實在熱死人了!

科學家都一早話畀我哋聽,人類大量用化石燃料,二氧化碳大量排放到地球上空,溫室效應下地球變得愈來愈熱。而術數家亦計算咗喺未來三元九運曆法,嚟緊就係下元九運,九運八卦中為「離卦」,離係火,所以未來20年,天氣整體會愈嚟愈熱。2020年2月,南極就已經首次創下攝氏20度高溫紀錄,極地不再極冷,熱力真係勁射,射到連企鵝都無碇企!

喺熱上加熱嘅景況下,分分鐘架車都有機會自動着火!就喺上個禮拜我睇到一單新聞,台北無端端發生咗火燒車嘅意外,經初步調查,疑似車主喺車內留有「含有電池」的物品,經太陽暴曬自動燃燒,於是就有專家提醒,有啲物品,千祈要注意喺夏天唔好立亂放喺車度。

老老實實,我之前真係從來無呢個概念。我將架車搞到好似流動之家咁,好多日用品都擺放喺車內,其中包括香水;好多香水嘅成分都含有酒精,如果將香水放咗喺擋風玻璃度,經過太陽直射,而剛好瓶身有放大的功能,其實就相當於喺香水前放一個放大鏡,照射時間長咗就會發生爆炸!

講到香水樽有放大功能,被太陽照射會引致起火,我有時直程放咗副老花眼鏡喺車頭玻璃,原來係非常危險……⋯

夏日炎炎,我哋有時又放咗啲罐裝汽水或啤酒喺車度,一旦溫度過高,罐體就會膨脹,裏面嘅汽水或啤酒就會噴出嚟,一唔好彩如果汽水噴到錶盤裏,或者係汽水罐鐵片被噴到人嘅面上,咁就破相。諗起都驚。

食煙嘅朋友,好多時亦將打火機就咁放喺車入面,危險性都幾高。可能有人會話佢放喺太陽未必照到嘅位置,咁就無事!No!即使太陽照射唔到,如果車內溫度特別高,佢依然會引起爆炸㗎!

小心駛得萬年船,千祈唔好唔覺意引火自焚,今年真係乜都要盡量小心。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭