黛安
黛安

戶戶送用特別送餐袋 助流浪貓狗尋家

發佈時間: 2020/08/06

戶戶送用特別送餐袋 助流浪貓狗尋家

關注流浪貓狗嘅朋友要留意喇,黛安聽公關姊妹講,戶戶送喺下星期一(10日)至23日,會同香港拯救貓狗協會合作,喺送餐保溫袋上印上待領養動物嘅相片和資料嘅貼紙,大家可以透過貼紙上嘅二維碼直接link入去領養頁面,幫助流浪貓狗搵一個溫暖嘅家!

最近疫情關係,大家都多咗叫外賣,依家不妨多留意送餐專員嘅送餐袋。公關姊妹話,今次活動至今已經有超過200名送餐專員登記參加,包括喺將軍澳區做戶戶送步兵嘅學生Mandy Lou,佢本身好鍾意狗狗,希望可以幫佢哋出一分力。香港拯救貓狗協會Linda Tse仲話,當聽到戶戶送向佢哋提出呢個合作提議,真係好開心,相信今次合作可增加待領養動物嘅曝光機會,一齊宣揚「支持領養等於拯救生命」嘅觀念。

撰文: 黛安 消息特靈八卦公關
欄名: 八卦名利場