【聲明】港生活網站並無進行電話推廣活動

陳淑蘭
陳淑蘭

秋老虎要養陰清燥

發佈時間: 2020/08/13

秋老虎要養陰清燥

終於上個禮拜立秋了。今年嘅夏天特別難耐,焗熱嘅天氣加上焗熱嘅口罩,火上加油!

雖然立咗秋,仲要捱埋呢個秋老虎。「秋老虎」係比喻立秋過後一段時間嘅天氣進展。理論上立咗秋,天氣應該開始要轉涼,酷暑結束;但實際唔係呢回事,立秋過後酷暑仲未捨得走,仲要持續一段長時間,而呢段時間烈日繼續威猛,甚至比立秋前仲熱,所以民間叫呢段時間嘅酷熱為「秋老虎」,唔係無佢嘅道理。

立秋之後,自然界嘅陽氣開始收斂、沉降,人體亦要順應自然,「順天時,因天序」,避免大量出汗同埋體力消耗,調整情緒,預防感冒。而家呢個新冠肺炎時勢,更加不能亂感冒!

按照《黃帝內經》「秋冬養陰」嘅原則,要以養陰清熱、潤燥止渴、清新安神嘅食品為主,可適當食用如︰芝麻、蜂蜜、百合、杏仁等柔潤食品,益胃生津,有益健康。

秋天容易燥,更加要多飲水,盡量潤肺生津、養陰清燥,咁不如索性煲啲立秋湯飲下。老黃瓜煲赤小豆及扁豆最宜「秋老虎」天氣,爭秋奪暑之際解暑、利濕及清熱。材料:老黃瓜1個、赤小豆及扁豆各1両、紅蘿蔔及粟米各1條、蜜棗4粒,加水大約兩升,鹽適量。另有蓮藕栗子赤小豆扁豆豬骨湯。材料:蓮藕約1斤半、扁豆、赤小豆及淮山各1両、紅蘿蔔及粟米各1條、栗子約10粒、蜜棗4粒、豬骨。

蓮藕可以補氣養血、健脾養胃;扁豆可以健脾化濕;赤小豆就利水除濕;紅蘿蔔可健脾助消化、潤燥明目;粟米就可以益氣補脾;栗子同淮山健脾開胃,其他好處為治療久瀉久痢、肺氣虛燥及消渴尿頻等症;蜜棗有止咳潤肺、化痰平喘功效。

而喺中國民間傳統風俗裏,赤小豆亦可用作辟瘟避疫。《雜五行書》中記載︰「常以正月旦,亦以辟疫病甚靈驗。正月七日,七月七,男吞赤小豆七顆,女吞十四枚,經無病,令疫病不相染。」當然你咪自己亂吞赤小豆,但用嚟煲湯,就應該萬無一失了!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭