【聲明】港生活網站並無進行電話推廣活動

陳淑蘭
陳淑蘭

逆境中互助

發佈時間: 2020/08/20

逆境中互助

啱啱個禮拜,睇咗《星期日檔案》,主題係︰「開飯難」。睇到我心到悒埋。

呢個新冠肺炎疫情,個個無啖好食,真係嗚呼哀哉!食肆堂食嘅限制,搞到無論係餐飲業老闆或食客,大家都「搵食」艱難!失業率飇升,令更多人嘅一日三餐都維持唔到。之前嘅香港係美食天堂,估唔到此美名不再。

因為我有揸車,因此我就肩負起買餸兼送餸同日用品去阿媽屋企嘅責任,話晒母親大人年紀大,一定要盡量減低家傭姐姐出外中招嘅危機。

雖然香港嘅經濟下滑,但我唔覺得買餸係平咗。我係無湯不歡,最好每日都有湯飲嘅人。嘩!去買煲湯豬骨豬肉,乜咁貴㗎!肉赤死我。話說我嗰日喺電台做完節目,之後去又一城超市一次過買日用品兼買埋餸。見到已pack好嘅粟米紅蘿蔔湯包價值39元,只要去凍肉部買埋豬骨,咁就攪掂晒。

點知當我見到,豬肉得嗰細細兩小嚿,都要成70蚊!我企喺度望住啲豬肉起碼5分鐘,內心交戰……買?定唔買?一煲咁嘅湯過百蚊?加埋菜加埋肉,我一個人食一餐,條數真係唔襟計。老實講,一個人,出街食,真係平好多。所以我點解咁鍾意每星期都喺屋企請朋友嚟屋企食飯呢!

通常家傭姐姐煮7、8味餸,次次客人都唔會食得晒;有剩可以畀我食4、5日,咁樣反而條數好似划算啲。你一定以為我計數好精明?錯嘞。連我呢個數字白癡,去街市超市買嘢都能感受到米貴,所以當我睇到《星期日檔案》反映基層家庭嘅困難,真係好心痛。

受疫情影響,多咗人失業,有更多家庭需要食物援助,但食物銀行近月收到嘅食物大跌,供應亦好緊絀,好多家庭可能無啖好食,好慘!

喺度我希望有能力嘅你同我,都可以有錢出錢,有食物出食物。喺呢個非常時期,大家互相幫助共渡難關。逆境無情,但人間有情!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭