【聲明】港生活網站並無進行電話推廣活動

陳淑蘭
陳淑蘭

七月切忌口多多

發佈時間: 2020/08/27

七月切忌口多多

農曆七月,台灣又稱為鬼月,皆因人民相信由七月初一開始,閻羅王就將鬼門關大開,放好多孤魂野鬼上人間。所以喺農曆七月,好似我咁「八卦」,都會特別小心留意咪鬼觸犯到呢啲禁忌;無論如何,真係寧可信其有!

所以通常盂蘭節,我都盡可能唔出街,仲要係唔出街兩日。因為我其實一直都唔係太確定盂蘭節究竟係農曆七月十四定係農曆七月十五?有資料顯示正日應該係農曆七月十五日子時開始,即係七月十四日晚上11時至十五日凌晨1時,為安全起見,既然自己搞唔清,索性乖啲,唔好亂噏嘢同立亂周圍去了。條街有好多人燒嘢,萬一我時運低,踩到啲金銀衣紙,又或者鬼覺得我靚,跟我返屋企咪弊?所以千祈唔好喺嗰啲日子鬼火咁靚,危險!

喺農曆七月,就算我見到地下有錢,我都唔會執。因為驚驚!咁如果喺其他月份見到地下有錢我執唔執?Of course!地上執到寶,問天問地都攞唔到!

喺着衫方面,我都一定唔會着黑色同紅色。因為聽啲前輩講過,着黑衫,黑黑沉沉,鬼怪靈體最鍾意依附。而紅色對於鬼嚟講,屬標奇立異的顏色,容易惹起注意。仲有一個禁忌切記︰平時可以囗多多,但特別嘅場合,特別嘅日子,千祈咪囗多多!真人真事,我親身中招!

話說好多年前,我爸爸過身之後,我去墳場拜祭時,見到佢旁邊墓碑有位年輕女子相片,於是我真心講出聲,話咁後生就離開真係替佢可惜……結果嗰幾年我嘅日子就唔慌唔可惜了。我身邊嘅人,要搵啲高人異士幫忙為我脫險。呢件事我就唔再詳細交代了,因為我怕怕……

所以雖然我平時真係囗多多,但去到啲神性嘅地方、陰性嘅地方或對住任何同靈界有關嘅物體,都以尊重嘅心對待,唔好立亂講錯嘢冒犯。畢竟喺呢個世界同宇宙中,人類未知嘅領域仲有好多,抱持着信而不迷、敬而遠之嘅態度係最明智㗎。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭