香港太古可口可樂期間限定店 登陸南豐紗廠

可口可樂係家喻戶曉嘅品牌，黛安收到風由9月1日起至27日，香港太古可口可樂將喺荃灣南豐紗廠（The Mills）開設主題為「時光荏苒情懷未變」期間限定店，店內分4部分，包括「時光隧道」、「歷史圖片」、「品牌精品」及「瓶瓶罐罐」，畀大家一齊分享香港太古可口可樂喺香港55年嘅點滴事迹。

例如喺「時光隧道」，牆上就展示咗可口可樂同香港太古可口可樂嘅歷史小百科；「歷史圖片」就有多幅珍貴圖片，包括著名影星林黛喺50年代已經做品牌代言人等等。

期間限定店更有逾千件可口可樂精品，同埋首次公開曝光嘅瓶與罐。展場內仲有可印上你照片嘅專屬可口可樂慈善瓶，部分收益會捐畀香港聖公會福利協會「心意行動」，有興趣可以喺網上預約參觀㗎！