【聲明】港生活網站並無進行電話推廣活動

陳淑蘭
陳淑蘭

食台豬隨時食着瘦肉精

發佈時間: 2020/09/10

食台豬隨時食着瘦肉精

台灣真係可以講得話係「豬」事不利。繼從口蹄疫疫區除名後,國際市場都仲未打開,台灣豬農都未趕得切嚟歡喜之際,總統蔡英文喺8月28日宣布,明年1月起會開放含萊克多巴胺(瘦肉精)美國豬及30月齡以上嘅美國牛進口台灣。

嘩!唔單止豬農個個怨聲載道,連台灣市民都「罵」聲四起。皆因食咗瘦肉精嘅豬,唔係怕會變笨,服用過量會引發心悸、心血管疾病,出現噁心、頭暈、手顫抖、血壓上升等中毒症狀……而瘦肉精係不能通過沖洗或煮食消減,人進食後會將藥物一併攝入體內。

我絕不是在隔岸觀火,最大嘅疑慮在於驚「混淆」,當肉品加工時就出現漏洞。好似台灣嘅香腸、貢丸或肉鬆等加工食品,若業者為咗成本考量用咗有瘦肉精嘅美國豬,單憑味道根本難以區分。於是我哋都分分鐘有機會中招。老實講,台灣好多好味嘅菜,豬肉絕對擔任重要角色。去到台灣,你無理由唔食番兩碗滷肉飯啩?所以我八卦台灣豬嘅事絕對合理!

不過呢單「豬事」,最令我覺得好睇嘅八卦點,就係今日嘅蔡英文打倒昨日嘅蔡英文。喺2009年曾發動「反毒牛大遊行」,當時嘅黨主席蔡英文、前主席游錫堃、台南縣長蘇煥智、立委蔡同榮及現任立委高嘉瑜都曾上街,高喊「反毒牛、反出賣、反欺騙」,反對「任何具有瘦肉精」的美豬進口;更拉布抗議「美豬若進口,總統要下台」(當年嘅總統係馬英九)。

時至今日,蔡英文成為咗總統,卻由佢嚟開放毒豬牛進口。佢嘅解釋係︰「因為時空環境嘅改變,讓我們能夠有空間做進一步開放的決定……」

所以高危一族嘅朋友,例如孕婦、發育中嘅小朋友,又或者我呢啲隨時有高血壓嘅老人……我哋都要有空間嚟做進一步開放的決定︰絕對要食得小心!因為我怕到時食完之後我哋唔知會去咗邊個時空環境!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭