黃金海岸「放天燈」商場中庭燈海璀璨慶中秋

黛安每次去台灣都會去放下天燈許願，可惜今年因疫情關係而未能成行。好彩日前收到公關姊妹報料，話黃金海岸都有得「放天燈」！原來今個中秋，黃金海岸商場會喺中庭擺放3.5米高嘅巨型天燈，利用多塊鏡折射近百個七彩LED燈泡發出嘅光芒，營造多個天燈同時升起嘅璀璨燈海，去打卡影相一流呀。

公關姊妹仲話，喺現場打卡並將相片上傳到facebook或Instagram，有機會贏取黃金海岸商場美食券，但係手快有手慢無㗎，活動由即日起至10月11日。另外，商場仲會提供小型天燈紙模，只要喺屋企打印出嚟就可以帶埋去影相。若然覺得喺屋企放天燈唔夠節日氣氛，商場喺今個星期六（26日）起亦會喺facebook搞猜燈謎活動，鼓勵大家動動腦筋，一齊拆解趣味網上謎語。