陳淑蘭
陳淑蘭

最緊要有覺好瞓

發佈時間: 2020/09/24

最緊要有覺好瞓

我身邊嘅朋友,好多都羨慕我「好瞓得」!無論飲幾濃嘅咖啡,下晝瞓咗幾多晏覺,都唔會影響我。我真係好鍾意瞓覺!

我後生嘅時候,亦因為怕無得畀我瞓覺而推job……咁算唔算係爛泥扶唔上壁?定應該話我係爛瞓上唔到位呢?總之都係嗰句︰我真係好鍾意瞓覺!

我有啲對瞓覺環境氣氛非常注重嘅朋友,床上用品極高級,但都無我咁瞓得。我用嘅床上用品係最普通嘅貨式,絕不能買貴嘢,因為我嘅貓同狗係「與蘭同眠」,佢哋隨時喺我張床度嘔,有時亦會屙……正確嚟講,我張床比較似係一個狗竇多啲,喺咁嘅環境都可以咁好瞓,實在不得不承認我確實係得天獨厚……

我不能捱夜。通常如果嗰晚無瞓夠,我第二日會反應遲鈍,成個人迷迷茫茫……我試過之前將一個紫水晶放喺床邊,我明明身心俱疲,但個腦卻不停諗嘢,但又唔知諗乜喎。連續好幾晚都不能入睡,原來水晶嘅磁場可以干擾我嘅腦電波,真係差啲癲!後來好彩畀我發現到,即刻將個水晶攞番出廳,我先可以安詳地睡眠。

所以話睡眠太少會影響健康我絕對相信。有好多疾病亦同睡眠不足有關,例如老年癡呆、癌症、心血管疾病、肥胖症、抑鬱症、焦慮,甚至自殺……所以能瞓一個好覺,可以令我哋嘅身心得到全面「整修」。睡眠不足有損健康,但科學家都話︰瞓太多可能會折壽。唔係啩?咁瞓定唔瞓呀?

經綜合分析得出結論︰每日攤喺張床度蒙頭大睡超過10個鐘,死於中風嘅危險會增加56%,心血管疾病危險會增加49%。異常睡眠係心血管疾病危險增加嘅訊號,所以應該將睡眠長度同睡眠質量綜合考慮。

文化、社會、心理、行為、環境、24小時不間歇嘅現代生活,都會為睡眠質量帶嚟影響。所以瞓好覺最重要就係︰帶住relax嘅心情去relax!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭