【聲明】港生活網站並無進行電話推廣活動

陳淑蘭
陳淑蘭

我們是受害者還是加害者?

發佈時間: 2020/10/15

我們是受害者還是加害者?

上年梁榮忠同林超榮已經大力推薦我睇台劇《我們與惡的距離》,力讚劇本優秀,演員將角色人物嘅痛苦,活生生呈現眼前,戲中各自有大善大惡嘅立場、原因,演得非常好。雖然故事係虛構,但戲中每句對白都是貼近現實嘅內心感受,令觀眾睇完此劇後都會有巨大嘅反思,亦令人感受到嗰份沉重嘅能量。

就係聽梁榮忠話套戲令人睇完會沉重,所以我一直都唔敢睇。上年至今年,大家身邊仲唔夠沉重咩,再嚟百上加斤,咪搞!結果喺上星期,我終於喺做足心理預備下,去睇呢套劇了。

可能係做足心理準備,無我之前諗會喊咁多,只係兩次左右,但反而個腦就不停去思考乜嘢係真正嘅善同埋惡……尤其係如果一個人有精神病,佢自己犯罪而不自知,是否要畀機會佢呢?咁被害嘅無辜者又點呢?喺唔同嘅位置,會有唔同嘅理由,我真係諗唔通。

唔好講好似好遠嘅思覺失調個案,好多腦退化嘅人都會有被害幻覺,我阿媽都開始時時覺得工人姐姐將洗潔精落入菜度害佢,我朋友嘅阿嫲覺得工人姐姐偷佢嘅糖尿病藥丸,我另一個朋友媽咪會將鉸剪放喺床頭,驚有人害佢……淨係我身邊都仲有好多個案,可想而知真係唔覺唔覺,我哋其實都在呢啲環境當中。

所以我亦很為有啲照顧者得不到足夠嘅支援而感到遺憾同難過。佢哋可能有經濟困難,又或者自己嘅健康,因着照顧時間長而力不從心,因而帶來無比壓力。

喺劇中,當有精神病人衍生嘅案件發生,就有無數網民發表毒舌言論,嚴重地攻擊受害者甚至加害者,成為現世代網絡世界一件最恐怖又令人心寒嘅事。

究竟我哋平日有無不知不覺近距離牽涉咗呢啲惡呢?我哋有無一點一滴堆積走向「惡」嘅社會呢?真係值得反思。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭