7仔、TINY微影聯乘LuLu豬 推迷你便利店模型

黛安對可愛嘅嘢完全無抵抗力，所以聽到公關姊妹講，最近有幾隻豬仔喺午餐肉罐頭走出嚟打理同幫襯7-Eleven，就急不及待問姊妹有無得睇。

姊妹就攞咗一系列1︰35嘅豬仔模型出嚟，再放佢哋入24小時營業嘅7-Eleven便利店模型，見到有啲豬仔食完飯盒飽飽哋攤喺地下，有啲豬仔就好勤力咁做店員，相當盞鬼。原來呢套模型係7-Eleven聯乘香港特色玩具品牌「TINY微影」炮製而成嘅，以便利店主體模型及「LuLu豬」組件模型，打造成以「LuLu豬」為主題嘅便利店，整得好精緻㗎。

依家會分3輪推出，喺7-Eleven買任何產品加$75就可換購，或者以$99購買一款。公關姊妹話，如果想集齊一套，就要勤力啲去7-Eleven買嘢喇！