【聲明】港生活網站並無進行電話推廣活動

陳淑蘭
陳淑蘭

被人笑都要食白子!

發佈時間: 2020/11/05

被人笑都要食白子!

每年到10至11月,我都會去日本食白子(魚精),因為白子喺冬天最肥美。雖然講起嚟令人有啲尷尬,但確實超級吸引。奶油般嘅口感,細滑豐腴,試咗第一次,我就已經踏上不歸路,上咗癮。入口嘅滋味,除咗個「正」字,我都唔知點去形容,絕對係非筆墨所能形容。

味道好之餘,白子仲要係充滿高蛋白、低脂肪,仲可以幫助降血壓,含豐富嘅的維他命B,可以促進新陳代謝、幫助蛋白質和脂肪的轉化同吸收,食咗靚之餘仲唔肥;而鉀則有調節心臟同肌肉功能嘅作用……你話點可以唔愛死佢?所以就算我旁邊嘅朋友鄙視或笑我食魚精,我係完全唔會理會嘅!咁好味又滋補嘅白子,唔食咪仲傻?最好你唔食,我可以食埋你嗰份!

我食過嘅白子有鱈魚白子同河豚白子。佢哋嘅長相完全唔同。河豚(雞泡魚)表面光滑,而鱈魚白子表面充滿溝壑,入口後先感受到的是白子表皮的調皮順滑,然後就能感受白子內部嘅細膩;而河豚白子只需輕輕咁咬開,就會爆開澎湃奶油般嘅食感。

至於味道,有人認為鱈魚白子比河豚白子的口味略重,略帶啲腥臭味,如果兩者要我揀一種,我都會先揀河豚白子,最好唔使揀,一次過食晒佢哋啦……

除咗呢兩款白子,仲有鮭魚白子,佢嘅外形細長、表面光滑;此外,鯛魚白子、烏賊白子等亦受到一啲日本人嘅青睞。可惜我仲未有機會試,亦唔知幾時先可以飛去日本試,唉!睇怕今年真係唔使旨意去到日本食白子。

最傷心嘅就係日本受新冠肺炎疫情影響,連我次次去大阪都必去食雞泡魚白子嘅著名地標「河豚燈籠」河豚料理店ZUBORAYA亦難抵疫情,喺今年迎來開店100周年之際,正式宣布結業。

不幸之中嘅大幸,就係畀我發現銅鑼灣嘅竹壽司有白子食,等我可以化悲傷為食量,一於食多啲再食多啲!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭