【聲明】港生活網站並無進行電話推廣活動

陳淑蘭
陳淑蘭

災難當前作最壞打算

發佈時間: 2020/11/26

災難當前作最壞打算

2019年同2020年嘅《地母經》預言都頗為準確。2021年嘅《地母經》我繼續引以為鑑。

「太歲辛丑年,疾病稍紛紛。」睇到《地母經》話「疾病稍紛紛」呢一句,2021年我會繼續步步為營,不敢鬆懈。我估計就算唔係呢個新冠肺炎,都擔心要小心有其他變種病毒。所以一定不能掉以輕心。

其實從今年3、4月起,已經聽到好多唔同國籍嘅玄學家一致叫人要特別注意12月。你可能覺得點解我咁都信?其實佢哋都舉出一啲根據,所以我對12月真係帶住戰戰兢兢嘅心情。

回顧歷史,碰上庚子年,通常都會發生天災人禍,或是誘發時代劇變。目前庚子年雖然已過了三分之二,但大家依然要小心為上。庚子的「子」是屬水,水土喺五行上屬於相沖,歷史上逢庚子年,常會有重大災難。

而印度神童阿南德(Abhigya Anand)喺今年4月初預測,全球將會喺2020年12月20日再度迎來大災難,據他形容,木星和土星將在12月20日完全相合,引發的宇宙現象,會給地球帶來嚴重的危機,此程度將遠遠超過新冠病毒疫情。

佢嘅預言有準亦有不準。但對我嚟講,當畀自己一個警惕及心理準備,未嘗唔係一件好事。

其實今年每個月、每個地方,都不停發生大變化,少啲正能量,情緒都會被打到落底綫,因此如果早有預計,萬一真係發生,因為一早預咗,點都會減少一啲衝擊……啩。如果唔發生,咁就當逢凶化咗吉,畀自己一個積極嘅阿Q諗法囉。

其實一早啲疾病專家已經不停提醒話年尾好大可能會爆發第四波疫情,擔心情況會更嚴重。因此就算呢兩個月平復番少少,我都唔敢對防疫放鬆,抱住呢個心態係好事。至少咪畀自己樂極生悲。

聖誕節好快就到,今年我唔期望可以Merry Christmas,只要保住Healthy Christmas,我就已經要感恩,講聲Amen!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭